Redentore, luche e s’Ortobene
chi mustrat sa manu sua a Nugoro,
pintande chelos luchidos chei s’oro
e ascurtande de sos nugoresos cada bene.
Sa cara pompiande inoche e in cue
sos pilos paren moghios dae su bentu,
su passu de sa zente colat lentu
firmandesi in s’artaria ube ses tue.
Son omines si lustran sos zippones,
preparandesi sos animos pro Agustu
precan a rosariu e ballana chin gustu,
sas feminas a benda e muccadores.
Chissai itt’este su chi pessas,
pompiande tottu custa galania,
si intendes sas campanas de Santa Maria
e si ti piachet tottu su chi osservas.
Nugoro ti cheret meda bene
bantandeti chi lustru e chin onores,
mancari calicunu rugat in errores
irmenticandesi custa ricchesa in s’Ortobene.
S’ispantu est petzi a ti pompiare
dae sos passibales de su Monte o dae Marreri,
chi siet unu printzipale o carrettoneri
biendeti dae innedda a t’ammirare.
