Su disizzu arribbat chin su bentu,
paris chin son nuscos de Sardigna:
sa murta, s’aranzolu e sa gramigna
de sa tua pitzinnia, pintana un ammentu.
M’ammentas sas nibadas de Nugoro,
sos rajos de s’istiu in su Gennargentu
cuddu beranu froriu chi colat lentu
profumos de atonzu in colore ‘e oro.
Forte che rocca de istirpe montagnina,
sos ocros tuos de su colore prus galanu
paret chi benzas dau unu mundu soberanu
profumada chei una rosa, una reghina.
Non bastat una bida a ti bramare
o su profumu ‘e milli lizzos de collire,
dae cando ti pompiavo in su jannile
sas cosas bellas de sa bida a t'augurare.
Si pesso a su tempus chi est colande
chin tecus sas bellesas no han affannos,
pedo a Deus chi ti cusservet a chent’annos
pro ti bier isposa e mama anninniande.
